Hövzə Xəbər Agentliyinin məlumatına görə “İdeal cəmiyyətə doğru” başlığı altında Məhdəviyyətlə bağlı mövzular silsiləsi, İmam Zamanın (ə) təlim və irşadlarını yaymaq məqsədilə hörmətli oxuculara təqdim olunur.

İmam Mehdi (ə) tərəfindən baş verəcək qlobal üsyan və inqilabın müəyyən nişanələri vardır. Bu nişanələri bilmək, önəmli təsirlər doğurur. Çünki bu nişanələr, İmam Mehdinin (ə) xilası və ədalətinin müjdəsi sayılır. Hər bir əlamətin baş verməsi möminlərin ürəyində ümid işığını daha da parlaq edəcək, eyni zamanda düşmənlər və sapqınlar üçün xəbərdarlıq və tənbeh rolunu oynayacaq, onların zülm və fəsad yolundan çəkilməsinə səbəb olacaqdır. Eyni zamanda, bu nişanələr möminləri zühuru daha yaxşı anlamağa və İmamın (ə) yanında olmaq üçün lazımı hazırlığı qazanmağa təşviq edəcəkdir.

Gələcəkdə baş verəcək hadisələr haqqında məlumatlı olmaq, həmçinin onlarla daha məqsədyönlü və səmərəli şəkildə qarşılaşmaq üçün planlama aparmağa kömək edir. Bundan əlavə, bu nişanələr Mehdi iddiası ilə çıxış edən saxtakarlığı müəyyən etmək üçün yaxşı meyar təşkil edir. Yəni, əgər bir şəxs  İmam Mehdi (ə) olduğunu iddia etsə, lakin onun üsyanı bu nişanələrlə müşayiət olunmasa, onun saxtakarlığı asanlıqla üzə çıxır.

İmamlar (ə) tərəfindən verilən rəvayətlərdə, zühurun çoxsaylı əlamətləri qeyd olunub. Onların bəziləri təbiət hadisələri və adi görünüşlü, bəziləri isə adi olmayan və möcüzəvi xarakterlidir.

Biz bu əlamətlərdən əvvəlcə etibarlı mənbələrdə daha çox vurğulanan əsas nişanələri təqdim edəcəyik, sonra isə digər əlamətləri qısa şəkildə qeyd edəcəyik.

İmam Sadiq (ə) buyurur:

«خَمْسٌ قَبْلَ قِیَامِ اَلْقَائِمِ عَلَیْهِ السَّلاَمُ اَلْیَمَانِیُّ وَ اَلسُّفْیَانِیُّ وَ اَلْمُنَادِی یُنَادِی مِنَ اَلسَّمَاءِ وَ خَسْفٌ بِالْبَیْدَاءِ وَ قَتْلُ اَلنَّفْسِ اَلزَّکِیَّةِ.» (کمال‌الدین، ج ۲، ص ۶۴۹)

“Qaimin (ə) üsyanından əvvəl beş əlamət vardır: Yəməni, Süfyanı, səmadan gələn çağırış (nida), Beydədə torpaq çökməsi (xüsf) və pak ruhun öldürülməsi (Nəfsi - Zəkiyyə).”
(Kamalud-Din, cild 2, səh. 649)

İndi bu rəvayətə əsaslanaraq, çoxsaylı rəvayətlərdə təkrarlanan beş əlaməti qısa şəkildə izah edirik, baxmayaraq ki, bu əlamətlərlə bağlı bütün hadisələrin detalları bizim üçün tam aydın deyil.

A. Süfyaninin gəlişi

Süfyanının gəlişi, rəvayətlərdə çoxsaylı hallarda qeyd olunan əlamətlərdən biridir. Ona görə təsvir edilir ki, Süfyanı, Əbu Süfyan nəslindən olan bir şəxsdir, zühurdan bir qədər əvvəl Şam torpaqlarında üsyana qalxacaqdır. O, qətl və zorakılıqdan çəkinməyən bir cinayətkardır və düşmənlərinə qarşı son dərəcə amansız davranır.

Bəzi rəvayətlərə əsasən, Süfyanının gəlişindən onun məhv edilməsinə qədər təxminən on beş ay davam edəcəkdir.

B. Beydə torpaq çökməsi (Xüsf bəyda)

“Xüsf” sözü torpağa gömülmə, “Bəyda” isə Məkkə ilə Mədinə arasındakı ərazi mənasını verir.

Beydədə torpaq çökməsinin mənası budur ki, Süfyani, İmam Mehdi (ə) ilə qarşılaşmaq üçün ordusunu Məkkəyə göndərir. Lakin ordusu Bəyda bölgəsinə çatanda, möcüzəvi şəkildə torpağa qərq olur.

C. Yəməninin xaric olması 

Yəməndən bir hökmdarın üsyanı, zühurdan qısa bir müddət əvvəl baş verəcək digər əlamətdir. Bu şəxs saleh və mömin bir insandır, şər və azğınlıqlara qarşı üsyan edəcək, bütün gücü ilə zülm və fəsadla mübarizə aparacaqdır. Onun hərəkət və əməliyyatlarının detalları isə bizim üçün tam məlum deyil.

D. Səmavi nida (Sihe Asemani)

Zühurdan əvvəl baş verəcək digər əlamət səmavi nidadır. Bu səs, bəzi rəvayətlərə görə, Cəbrayıl (ə) tərəfindən göndərilən nidadır və Ramazan ayında eşidiləcəkdir. Çünki İmam Mehdi (ə) tərəfindən baş verəcək üsyan qlobal xarakter daşıyır və hər kəs onun baş verməsini gözləyir, buna görə də səmavi nida dünyanın müxtəlif guşələrindəki insanlar üçün bu hadisədən xəbərdar olma yoludur.

Bu nida möminlər üçün sevincli bir müjdə, fitnəkarlar üçün isə xəbərdarlıqdır, onları pis əməllərindən çəkindirməyə və İmamın (ə) tərəfdarları sırasına qatılmağa təşviq edir.

E. Pak ruhun qətl edilməsi (Nəfsi zəkiyyə)

“Nəfsi zəkiyyə” yetkin və kamil insan, həmçinin pak və günahsız şəxsi ifadə edir. Pak ruhun qətl edilməsi əlaməti budur ki, İmam Mehdi (ə) üsyan etmədən bir qədər əvvəl, əhəmiyyətli bir şəxs və ya günahsız bir insan düşmənlər tərəfindən öldürüləcəkdir.

Bəzi rəvayətlərə görə, bu hadisə İmam Mehdi (ə) üsyan etməmişdən on beş gecə əvvəl baş verəcəkdir.

Rəvayətlərdə başqa çoxsaylı əlamətlər də qeyd olunub, onlardan bəziləri:

Dəccalın gəlməsi insanların çoxunu azdıran hiyləgər və şər qüvvə,

Ramazan ayında günəş və ay tutulmaları,

Fitnələrin üzə çıxması,

Xorasanlı bir şəxsin üsyana qalxması və s.

Qeyd etmək lazımdır ki, bu əlamələrin təfsilatı və təhlili geniş şəkildə müxtəlif kitab və mənbələrdə izah olunub.

Bu müzakirələrin ardı var....

Mənbə: Negine afərineş kitabı, müəyyən dəyişikliklərlə